Ibon Uribarrik irabazi du Literaturako Nobel saridunak euskaratzeko AEDk eta Elkar-ek, Kutxaren laguntzarekin antolaturiko Jokin Zaitegi itzulpen lehiaketa; halaxe erabaki du aho batez Joxe Austin Arrietak, Joxe Mari Berasategik eta Irati Marañonek osaturiko epaimahaiak. Uribarrik, iazko urte amaieran Suediako Akademiak hautaturiko Herta Müler idazle errumaniar-alemaniarraren azken eleberria euskaratuko du, Atemschaukel (Arnasaren kulunka), kritikak goraipatua. Aurten plazaratuko du Elkar argitaletxeak.

Ibon  Uribarri Zenekorta (Zarautz, 1967)  Filosofian doktorea da, eta itzulpengintzako irakaslea EHUn. Filosofiako hainbat lan itzuli ditu, besteak beste, Kant eta Hegel, eta japonieratik ere euskaratu ditu zenbait literaturgile: Kawabata eta Murakami.