Iratxe Esnaola Aldanondok irabazi du Ondarroako Udalak eta Elkar argitaletxeak antolatzen duten Agustin Zubikarai nobela laburren lehiaketa, Galerna izeneko lanari esker. 5.400 euroko saria jasoko du idazle gazteak, eta Elkar argitaletxeak udaberrian kaleratuko du eleberria. Hala erabaki du Miren Agur Meabek, Ana Urkizak eta Xabier Mendiguren Elizegik osatzen duten epaimahaiak.

Donostian jaio zen Iratxe Esnaola 1983an. Kazetaritzan lizentziatua da EHUn, eta Literaturaren Teorian eta Literatura Konparatuan Granadako Unibertsitatean. Gaur egun unibertsitateko irakaslea da Txileko Santiagon.

Galerna: abuztuko azken eguna da itsasertzeko hiri turistiko batean; beroa jasanezina da, eta galerna datorrela antzematen da.  Giro sargori horretan lau pertsonaia, beren arteko harreman nahasietan korapilaturik. Erritmoaren erabilera bikainez eta tentsioari une oro eutsiz, sentimenduen biluzte-ariketa trebea egiten du egileak, erromantizismoaren antipodetan, pertsonaiekiko distantzia nabarmen uzten duen idazkera hotz eta zorrotz baten bidez.