Ipuinak entzuteko aukera ematen duen web gunea da 'etxegiroan.com', ipuinak euskaraz zein gazteleraz, ipuinak helduentzat zein haurrentzat. Maria Uriarte, haren bikotekide Tomas eta Osoitz Elkorobarrutia daude proiektu berri honen atzean. Kontakizunak hartu, grabatu eta, musikaz lagunduta, modu erakargarrian aurkezten dituzte. "Mimo eta maitasun handia darien lanak egiten ditugu etxeko estudioan", diote web gunean bertan. "Narrazio laburrak, poemak, liburuen pasarteak eta haurrentzako ipuinak grabatu eta editatzen ditugu, musikaz batera".

Grabazio horiek edonoren esku jarri dituzte www.etxegiroan.com web gunean.  "Gure gustuko testua aukeratu, mamurtu eta hots bihurtu. Ondoren, ipuina musikatu, ahotsa emeki 'labekatu' eta hori guztia zuen bihotz-belarrien gozamenerako gauza bilakatu".

Ipuinak hiru multzotan sailkatuta aurkituko ditu bisitariak: helduentzat euskaraz, haur eta gazteentzat euskaraz eta helduentzat gaztelaniaz. Besteak beste, Harkaitz Cano, Amets Arzallus, Miren Agur Meabe, Uxue Apaolaza edo Arantxa Iturberen lanak aurki daitezke bertan, baita Benedetti edo Cortazarrenak ere.